Gusto sana kitang bilhan ng isang dosenang bulaklak. Kahit na mahal. Kahit na hindi ka mahilig dito. At mag-iipit ako ng isang sweet na love note para sa iyo. Sasamahan ko na rin ng tissue, dahil tulad ko, mababaw ang luha mo.
Bibili rin tayo ng magarang damit, at dadaan sa suki mong parlor. Para maganda ka pag tayo'y namasyal. Ipagmamaneho kita buong araw, at tayo'y o-order sa mga paborito mong kainan. Kahit na mga bawal sa iyo, di kita pipigilan.
Mamamakyaw tayo ng mga pasalubong sa mga apong spoiled sa iyo. Bibisita rin tayo kina Tita, dahil siguradong nami-miss ka na niya. At bago umuwi, dadalaw tayo kay Papa para mag-alay ng dasal.
Kaya Ma, sana nama'y makabangon ka na. Mamulat na'ng iyong mga mata. Maramdaman kong muli ang iyong haplos. Mapakinggan ang iyong tawa. Sa kabila ng matagal mong pagkakaidlip, sana'y naririnig mo pa rin ako. Nakikilala.
Andito lang ako. Naghihintay.
photo credit: flickr - atilay
