Wala akong kasamang mag-lunch kanina. Mabilis kong inubos ang aking pagkain at gumala na lang sa loob ng shopping mall. Dahil depressing para sa akin ang paglamig ng panahon, nag-impulse buying na naman ako para maibsan ang lungkot.
Bitbit ang pinamili pabalik ng opisina, tinanong ako ng kasamahan kong tsismosa kung sale daw ba. Inamin kong napabili lang ako para maaliw. Natawa siya dahil gawain daw ng babae yun. Gusto kong sabunutan ang kaniyang uni-brow at kulutin ang kaniyang nguso.
Toxic uli ang araw na ito. Halos alas onse na ng gabi, pero may isa pa akong meeting. Said na ang aking lakas, pasensiya, at good vibes. Kaunti na lang ang naiwang tao kaya't binuksan ko ang mga pinamili at isinuot ang bagong sapatos. Kinunan ko ito sabay send ng MMS sa aking asawa.
Natawa lang siya at nang-alaska bago ako muling kinulit na kumain daw muna. Pumatak ang alas-onse, kailangan ko nang pumunta ng boardroom para sa meeting. Tumayo ako't humayo, suot ang aking bagong sapatos at ang panibagong sigla sa aking lakad.
